酸忌廉香草醬拌西班牙黑毛豬扒配芝士香草焗蕃茄

酸忌廉香草醬拌西班牙黑毛豬扒配芝士香草焗蕃茄

🥕材料 (2人份) ~ $88.3：

西班牙黑毛豬扒 2 塊 (Batalle) ~ $72
酸忌廉 (Paul's) 2 湯匙 ~ $6
自家製羅勒香草醬 2 湯匙 參考於 羅勒香草醬 Basil Pesto
雞湯 100ml ~ $1.3

喜馬拉雅岩鹽 少量

黑胡椒 少量

🥕芝士香草焗蕃茄材料

番茄 2 個 ~ $4
蒜蓉 2 湯匙
香草 Rosemary 少許

Parmesan cheese 少許 ~ $5
喜馬拉雅岩鹽 少量

黑胡椒 少量

🍳 煮法：

1) 急凍豬扒預早一晚從冰格放至蔬菜隔解凍，煎豬扒前 30 分鐘拿出至室溫。豬扒不用洗，只從包裝盒裏拿出放在砧板上。

2) 用尖刺或小刀在豬扒表面上不斷篤出小孔。

3) 然後用鬆肉鎚把豬扒表面錘鬆。

4) 最後用少許鹽及黑胡椒把豬扒兩邊醃 10 分鐘。

5) 醃肉的時候，把蕃茄切開，預熱焗爐 180 度 10分鐘。

6) 將蒜蓉及香草放在表面，如果可以塞入到蕃茄肉中，再灑一點鹽及黑胡椒。

7) 最後灑上芝士， 用 180 度焗 12 分鐘。

8) 生鐵鑊燒熱，加少少橄欖油，用中火先把豬扒旁邊煎封大約 1 分鐘，再反轉煎另一邊，直至 4 邊全部煎至金黃。

9) 邊緣煎好，開大火把豬扒一面煎二分鐘，然後反轉另一面再煎二分鐘，煎的時候盡量不要郁動豬扒。

10) 最後熄火、冚蓋，用餘溫將豬扒焗 1-2 分鐘。

11) 焗豬扒的時候煮醬汁，燒燒鑊，下牛油。

12) 下香草醬炒香。

13) 加雞湯煮勻。

14) 最後收小火，下酸忌廉，慢慢煮勻，即成。

15) 番茄焗好，拿出拌碟。

16) 最後把豬扒、番茄放在碟上，加上醬汁就可以上枱。

💡 小貼士：

• 豬扒解凍方法會影響煎的效果，如果是急凍扒忘記早一晚拿到下隔雪櫃，不如等多一天才煎，無謂浪費了一塊靚豬扒；
• 煎豬扒前，用少許鹽及黑胡椒醃一醃，煎出來更有咸香味；
• 用尖刺或小刀在豬扒表面刺孔，令到醃得更入味；
• 豬扒先煎封邊沿，等肉汁不易流走；
• 當大火煎豬扒時，不要郁動豬扒，因為每一郁動，肉汁就會流走，黑毛豬油分重不會黐鑊的；
• 以 1 吋厚豬扒，要全熟大約每邊煎 2 分鐘，其實 1 分半鐘也可以，之後可以焗 3-4 分鐘。不過每一家的爈火大小不同，都要試多幾次才可以掌握火喉。

🍽 食後感：

最近因為疫情，其本上每日也是在家裏食飯，所以差不多每星期也去一次附近街市入一次貨。偶然行過一間凍肉舖，貨不多，但見到有些貨幾靚就停低望下，老細就介紹了這塊西班牙黑毛豬扒，說好好食，不用醃，解凍後就咁煎就食得。通常去凍肉舖，不是高級食材店，好少老細會係到介紹，見又不是很貴，就買了回來。怎知真是有驚喜，係我食過最好食嘅豬扒。

上網查一查，原來隻豬有名堂 www.batalle.com，而且好多地方都有得買。

今次豬扒煮得啱啱好，食落有豬味，但冇豬騷，而且咬落口感索索聲。個汁用紅菜頭湯剩下的酸忌廉及之前自製的羅勒香草醬，效果居然出奇地夾，酸味可去除豬肉的油膩感。整個菜是近期比較滿意的，諗起就想再煮嚟食。

參考網站：
【優質港豬扒 幸福滿足正】 香煎本地黑豚肉斧頭扒_肥媽教煮食好D食平D
芝士香草焗蕃茄

 

如果覺得文章有用或值得支持，就請 like (like 的方法) 多啲啦！謝謝各位！