「巉岩洞穴奇石丘」土耳其11天 [Kuoni 勝景遊] - 購物篇

上幾個星期去了土耳其旅行，當然有買一些手信回來。香港居住地方細小，而家買手信都係食得嘅嘢多，小擺設就盡量避免，先來一張大合照。

今次跟團去土耳其係第一次跟 Kuoni，未跟過就唔好試啦，現實跟廣告差別實在太大了。

好似買得幾多嘢，不過其實因為旅行團安排不當，行程只有好少時間去行街買嘢。而最鍾意去嘅 market 同超級市場基本上沒有安排，只是去了一啲小鎮嘅便利店。

土耳其普遍生活水平喺歐洲嚟講非常低，物價非常便易。而且最近土耳其里拉急速貶值，差不多 1 蚊里拉對 1.5 港元，變得更加吸引。

當然不要期望土耳其有什麼時裝或者大牌子 shopping， 去的地方全部是遊客區，都是做遊客生意。土耳其嘅食品及工藝品非常之值得購買，好有特色。

首先當然係手信，土耳其有好多醣果店，多數都偏甜，但呢一間糖果店產品就冇咁甜。不過好奇怪土耳其人咁鍾意食甜嘢，但係又唔會好肥，唔知道係乜嘢原因？

İstiklal Avenue 獨立大街
Kuloğlu, İstiklal Cd., 34433 Beyoğlu/İstanbul, 土耳其
https://goo.gl/maps/fAxAFgbyeHSTcM3i7

這間糖果店喺土耳其有好多分店，我哋喺伊斯坦堡獨立大街分店買，有好多香港人及大陸站去買，有得試食，我哋就求其買咗一堆返嚟送禮自奉。

左手邊嘅朱古力棒喺土耳其一個朱古力牌子，在好多油站、便利店都有得賣。呢一款 60% bitter 冇咁甜，而且有當地出名嘅開心果 。當正餐冇嘢好食又要坐長途車的時候，佢就成為咗我哋維持生命嘅食糧。

Şirince Köy Pazarı
Şirince, 35920 Selçuk/İzmir, 土耳其
https://goo.gl/maps/X55KDxRD2weQbaELA

旅程途中去了一個小鎮，有好多餐廳，店舖售賣紀念品。不過最慘又係行程安排只畀我哋一個鐘頭行，想飲杯土耳其咖啡或茶都冇時間。如果自由行推薦去返大半日，食個 lunch、飲下茶 ，感受一下小鎮風味。

通常去旅行如果當地有酒出產都會買一兩支返嚟，唔係鍾意飲而係攞嚟當裝飾擺。土耳其出名係生果酒，所以就買了一支石榴酒及藍莓酒，甜甜地幾好飲。

Şirin Şarap Evi

Şirince, Şirince Köyü İç Yolu, 35920 Selçuk/İzmir, 土耳其

https://goo.gl/maps/Efpvf3uLnQGMCM5L8

因為早去其實好多鋪頭都未開，不過呢間舖頭入面嗰啲白紙其實係啲客人寫嘅讚美意見，所以斷估啲酒都唔差啩！

土耳其最出名係無花果，係小鎮入面有好多舖頭攞自己種嘅無花果出嚟賣。我哋就同阿婆買咗啲，佢好熱情咁畀我哋試食，雖然係散裝，唔係盒裝，個樣冇咁靚仔，但係食落去就好好味。

除了嘢食，土耳其有好多好靚嘅手工藝品，呢一啲畫曬花嘅碗係其中之一樣特產。不過質量同埋價錢唔同舖頭參差非常之大，我哋喺呢間舖頭見到呢幾個碗幾十蚊，質量非常之好，所以就買咗幾個。

Artemis El Sanatları

Şirince, 35920 Selçuk/İzmir, 土耳其

https://goo.gl/maps/69bXfgVmYyiXQD928

不過最慘係最鍾意嗰個，居然返嚟打爛咗，所以同佢影張遺照紀念下。

另外非常之值得購買嘅就係香草及香料，領隊講土耳其菜係全世界三大菜系之一。第一係當然係中國菜，第二係法國菜，第三就係土耳其菜，所以土耳其人用好多唔同嘅香料去煮食。初時我以為跟印度菜差不多，因為都係見到啲咖哩粉、黃薑粉之類，但係食過就知道好大分別。

去咗間小鎮嘅超級市場，掃咗好多香料、豆、米、意粉等，檸檬汁都買咗樽，因為實在太平，每樣都係幾蚊雞。 之後會煮啲土耳其食譜，應該會用到，不過都有可能買返嚟得個擺字。

Borsa Market

Tepebaşı Meydanı, 50650 Ortahisar/Ürgüp/Nevşehir, 土耳其

https://goo.gl/maps/NsJDDbNTik7B55BC8

途中去咗個山區參觀了一個地下城，以前啲人係住係洞穴裏面。而家就變咗一條小村莊，有啲村民同細路仔喺度賣嘢，我哋就隨便同佢哋買咗啲嘢，其實係當幫下啲山區小孩。

Cardak Underground City
50000 Çardak/Nevşehir Merkez/Nevşehir, 土耳其
https://goo.gl/maps/hpDZh6U5XqDAyzK47

之前去過幾次非洲、中東，去到一啲山區村落，領隊都會預先叫我哋準備定啲糖呀、食物呀或者少少碎銀去畀啲細路仔。但今次個領隊講就滿口仁義道德，但就提都冇提過，咁我哋自己見到就幫佢哋買下嘢。

同車其他團友全部都一早上曬車，其實佢哋好似都見唔到啲細路仔好慘， 喺其他地方佢哋就不斷買嘢，係呢度就反而冇，可能覺得啲嘢 cheap。

香港人以及香港嘅小朋友，其實真係好幸福。其他地方嘅小朋友食都未必有得食，細細個就要出嚟幫手做嘢。不過人就梗係唔會滿足，未捱過苦又點會明白，真係身在福中不知福。

呢個銅煲喺土耳其好普遍，只係買幾十至一二百蚊，不過還未用過唔知好唔好用。本來想揀多啲，但係我哋去到 Grand Bazaar，本來茶會話有成兩三個鐘頭行，點知個領隊玩嘢，到尾只得返 45 分鐘，所以冇時間㨂。

Grand Bazaar

Beyazıt, Kalpakçılar Cd. No:22, 34126 Fatih/İstanbul, 土耳其

https://goo.gl/maps/skn7CUKhKXqQDqaD7

呢個阿叔好搞笑，我哋其實只係想影間舖頭，但係佢又要喺度擺 pose ，冇辦法啦間舖頭係佢嘅。

土耳其出產好多橄欖油，呢罐橄欖油係機場用淨返啲錢買，隔離嗰樽係石榴汁醋，土耳其人用嚟食沙律，味道幾特別幾開胃，所以就買咗一樽試下。

好似買咗好多嘢，但其實領隊安排好差，每個買嘢點只有 45-60 分鐘時間，我還有很多東西想買，但唔夠時間睇。不過個領隊帶我哋去買皮褸、地氈、寶石個啲有水袋嘅舖頭就唔限時，次次磨粒幾兩個鐘，價錢比出面貴兩至三倍，所以浪費哂啲時間。大佬呀！我唔係跟大陸團喎，因此以後一定唔會再參加 Kuoni 旅行團。

如果覺得文章有用或值得支持，就請 like (like 的方法) 多啲啦！謝謝各位！