但好奇怪，當我哋飲茶，我哋完全唔會問啲茶係邊到嚟，係咩牌子，新茶定舊茶，通常我哋只會知道係普洱、鐵觀音、水仙、壽眉等，其他一概不知就飲咗落肚。呢樣嘢真係好唔符合香港人嘅性格，咩嘢都要挑剔下🤨，唔係正宗就唔食。
今次唔同楊州冇炒飯、海南島冇海南雞，係古代普洱茶真是由中國雲南省一個叫普洱市的地方出產。嚴格來說也不是出產，因為普洱市冇茶園，但附近所有種植茶葉的地方，都會將茶葉運到普洱市買賣，然後再運到其他地方。所以古時候由普洱市運出的茶葉就叫普洱茶。
但係我哋而家飲緊嘅深啡紅色普洱茶，古時候係冇嘅，呢種茶都係近呢五十年才係香港、廣東、東南亞開始流行，係唔係估唔到呢🤔？到現在為了分別兩種茶就變成普洱生茶及普洱熟茶，不過香港人少飲普洱生茶(因為酒樓冇得叫🙄)，所以好多香港人以為普洱茶就只是好深色黑蚊蚊哪一種。
或者有人會反拗，唔係喎我老豆、亞媽好細個已經飲熟普洱，冇理由以前係冇嘅？
咁就要講下古仔，話説以前嘅普洱茶就係現在所叫嘅普洱生茶，係冇普洱熟茶呢樣嘢，茶葉沖出來的茶湯是淡黃色或偏紅的琥珀色。不過以前啲茶葉做出來都要運去其他好遠地方，例如蒙古，當時運輸只有走路要花好長時間。當中日晒兩淋，茶葉放係馬背上濕完又乾、乾完又濕.....。
去到蒙古，其實都知啲茶葉變咗質，當地人沖茶，啲茶湯居然變咗黑蚊蚊深啡色，跟出發的時候唔同。但蒙古人將啲茶加羊奶變成酥油茶，飲咗之後發覺啲茶可以幫佢哋腸胃蠕動，有得去大💩（蒙古人飲食冇乜植物性纖維吸收，肚仔時時都谷住谷住去唔到廁所），因此就好喜歡呢種茶。
所以好耐以前所謂嘅普洱熟茶，其實係由生茶放係到好耐慢慢變成，又或者係個別茶商、廠家有些獨門秘技將生茶快速熟成，因此以前飲到嘅普洱熟茶同而家係有分別。
直到大約 1973-1974 年，國營昆明茶廠成功研發了“普洱熟茶渥堆技術”，即是普洱茶可以經過大約 45 天發酵過程就變成普洱熟茶，從此普洱熟茶才開始大量生產。
唔講唔知，原來當年嘅渥堆技術一直都係國家秘密，冇對外公開過，所以只有幾間國營茶廠以及相關技術人員才知道核心技術。因此如果你飲緊嘅普洱茶唔係呢幾間茶廠生產，基本上都唔可以叫做正宗普洱熟茶。而當時用呢種新技術生產出嚟嘅茶葉供應香港市場的產品，就係中茶 7581 茶磚。兒時上茶樓的味道，你還記得嗎😋？
沒有留言:
發佈留言